Një 40-vjeçar humbi jetën sot në Durrës si pasojë e goditjeve me thikë. Ngjarja ndodhi afër shkollës 9-vjeçare “Jusuf Puka”.
Raportohet se autori i dyshuar, Arben Koçilja, goditi me thikë në zemër Halil Kokën, i cili nuk mbijetoi dot dhe humbi jetën rrugës për në spital. Mësohet se viktima dhe autori jetonin në një pallat.
“Plagosi me mjet prerës (thikë) një shtetas i cili humbi jetën gjatë transportimit për në spital, Policia identifikon autorin dhe vijon kontrollin dhe ndjekjen për kapjen e tij. Rreth orës 12:30, në lagjen nr. 4, dyshohet se gjatë një konflikti të çastit, shtetasi I. K. ka goditur me mjet prerës (thikë), shtetasin H. K., i cili si pasojë, ka humbur jetën gjatë transportimit në spital.
Shërbimet e Policisë kanë shkuar në vendngjarje, kanë rrethuar zonën dhe po bëjnë krehjen e saj, me qëllim kapjen e shtetasit I. K. Grupi hetimor ndodhet në vendngjarje dhe po punon për sqarimin e rrethanave të kësaj ngjarjeje.”, thuhet në njoftimin e policisë.
