Një polic bullgar u qëllua për vdekje në kufirin me Turqinë në pjesën juglindore të vendit, dyshohet se në një shkëmbim zjarri me një grup emigrantësh.
Këtë e ka bërë të ditur të martën ministri i Punëve të Brendshme të Bullgarisë, Ivan Demerjiev, sipas Reuters.
Ngjarja ka ndodhur në orën 20:30 të hënën, kur një punonjës i policisë kufitare dhe një ushtar që patrullonte në zonën kufitare afër fshatit Golyam Dervent u qëlluan nga territori turk, tha Demerjiev.
Policia, e cila po kontrollonte hapjen e gardhit përgjatë kufirit, ka ndërruar jetë në vend. Ushtari, i cili nuk u lëndua, iu përgjigj zjarrit pasi dëgjoi 10 deri në 15 të shtëna dhe grupi i emigrantëve u tërhoq.
“Ky është një akt kriminal, agresion ekstrem… Ky është sulmi i parë me armë zjarri nga emigrantët”, tha ministri, i cili shkoi në vendngjarje.
“Tash e tutje do të jemi të pakompromis ndaj kujtdo që rrezikon shëndetin dhe jetën e oficerëve tanë”, tha ai.
Nuk është e qartë se sa i madh ishte grupi i emigrantëve apo nëse një ose më shumë persona hapën zjarr ndaj oficerit dhe ushtarit.
Demerjiev tha se autoritetet turke premtuan të bashkëpunojnë dhe të kërkojnë përgjegjësit.
Bullgaria ka vendosur rreth 350 trupa përgjatë kufirit të saj jugor me Turqinë dhe Greqinë për të ndihmuar policinë kufitare të merret me fluksin në rritje të emigrantëve.
