Alfred Peza do të jetë drejtuesi i ri i RTSH për 5 vitet e ardhshme. Ish-deputeti i Partisë Socialiste Alfred Peza është zgjedhur sot Drejtor i Përgjithshëm i Radio Televizionit Shqiptar me 9 vota PRO nga 9 anëtarë prezentë në mbledhjen plenare.
Përballë Pezës në këtë post ishin 3 kandidatë, Laureta Roshi, Enrik Mehmeti dhe Helidon Haliti.
Në dëgjesën publike ishin parashikuar të dëgjoheshin 4 kandidatë që u kualifikuan në garë, por një prej tyre Helidon Haliti njoftoi Këshillin Drejtues se për arsye shëndetësore, tërhiqej nga gara.
Për opozitën, zgjedhja e Pezës është në shkelje të ligjit.
“Sic e paralajmërova në dëgjesën me Këshillit Drejtues tē RTSH, ishte paracaktuar nga kryeministri zgjedhja e Pezës në mënyrën antiligjore në krye të institucionit.
Në ligj Nr. 97/2013 “PËR MEDIAT AUDIOVIZIVE NË REPUBLIKËN E SHQIPËRISË, në nenin 104 ku flitet për papajtueshmerite dhe konflikti i interesave te Drejtorit te Pergjithshëm te RTSH-së, në pikën 1 thuhet se: Drejtori i Pergjithshem i RTSH-se nuk lejohet:
a) të jetë anëtar i partive dhe shoqatave politike, kandidat per deputet apo te jete zgjedhur i tille në 2 legjislaturat e kaluara te, te kete konkurruar per kryetar te njësive vendore ne zgjedhjet e fundit të organizuara per to apo kanë ushtruar detyren e kryetarit te bashkisë, anëtarit te Keshillit te Ministrave apo te prefektit gjatë 3 viteve te fundit, si dhe ata qe jane anëtare te Keshillit të Ankesave, AKEP-it apo punonjes te ketij te fundit;
Alfred Peza ka qenë i zgjedhur deputet i Partisë Socialiste në periudhen 2013-2017, ç’ka në fakt korrespondon me faktin qe ka qene deputet ne nje nga dy legjislaturat e fundit. (2013-2017;2017-2021 janë dy legjislaturat e kaluara)
Gjithashtu Alfred Peza është edhe anëtar i Partisë Socialiste, ka qënë i zgjedhur sekretar i saj dixhital dhe ne forumet drejtuese të saj, ç’ka është edhe një fakt tjetër qe bie ne papajtueshmeri me ligjin.
Kapja e çdo institucioni publik të krijuar me ligj si të pavarur është modeli i një shteti parti që nuk funksionon si demokraci. Dënoj me ashpërsi shkeljen e ligjit dhe si anëtare e komisionit të medias do përdor çdo mekanizim kundra saj”, tha deputetja Ina Zhupa.