Sllovakia ia ka dorëzuar Ukrainës katër avionët e parë luftarakë MiG-29, nga 13 që janë premtuar, tha të enjten Ministria sllovake e Mbrojtjes.
“Katër avionët e parë u janë dorëzuar në mënyrë të sigurt Forcave të Armatosura të Ukrainës”, tha ministria.
Sllovakia tha se transferimi u krye nga pilotët ukrainas dhe se javëve të ardhshme do t’i dorëzohen Ukrainës edhe pjesa tjetër e avionëve. Qeveria e Sllovakisë miratoi transferimin e flotës së saj të avionëve luftarakë të epokës sovjetike MiG-29 javën e kaluar.
Sllovakia u bë vendi i dytë anëtar i NATO-s, pas Polonisë që dëgjon kërkesat e qeverisë ukrainase për avionë luftarakë.
Përpara pushtimit të plotë të Rusisë në shkurt të vitit 2022, Ukraina kishte disa dhjetëra MiG-29 që trashëgoi pas rënies së Bashkimit Sovjetik në vitin 1991, por është e paqartë se sa prej tyre mbeten në shërbim pas më shumë se një viti luftë.
