Shkencëtarët kanë zbuluar një virus të ri të ri në Kinë që ka infektuar deri më tani dhjetëra njerëz. Zyrtarët shëndetësorë në Kinë po monitorojnë përhapjen e një virusi të ri që ka infektuar shumë qytetarë, pavarësisht se asnjëri prej tyre nuk ka patur asnjë kontakt të afërt me njëri-tjetrin.
Henipavirusi Langya, i cili zakonisht gjendet te lakuriqët e natës, numëron 35 infektime në provincat e Shandong dhe Henan, sipas Qendrave për Kontrollin e Sëmundjeve të Tajvanit (CDC), sipas Taipei Times.
Zëvendësdrejtori i Përgjithshëm i CDC, Chuang Jen-hsiang tha për Taipei Times se nuk ka pasur raste të konfirmuara të transmetimit të virusit nga njeriu te njeriu, megjithatë ai u bëri thirrje njerëzve t’i kushtojnë vëmendje përditësimeve të mëtejshme teksa autoritetet vazhdojnë hetimet.
Njoftimi vjen pas një studimi të botuar në New England Journal of Medicine. 26 nga 35 pacientët e infektuar kanë vuajtur simptoma të ngjashme me gripin, teksa studimi nënvizon se simptomat e henipavirusit Langya deri më tani përfshijnë ethe, lodhje, kollë, dhimbje koke, humbje të oreksit dhe të vjella.
Studimi gjithashtu vuri në dukje se studiuesit zbuluan se pacientët me virus vuanin nga një rënie e qelizave të bardha të gjakut, numër i ulët i trombociteve dhe në disa raste mosfunksionim i mëlçisë ose veshkave.
Henipavirusi Langya i përket familjes së henipavirusit, dhe ka dy viruse të identifikuara më parë; virusi Hendra dhe virusi Nipah. Viruset nga familja henipavirus kanë një shkallë vdekshmërie deri në 75%, duke e bërë shkallën e vdekshmërisë shumë më të lartë se Koronavirusi, raporton Organizata Botërore e Shëndetësisë.
Zëvendës Kryemjeku në departamentin e Sëmundjeve Infektive të Spitalit Huashan, i lidhur me Universitetin Fudan, Wang Xinyu, paralajmëroi se bota duhet të përgatitet për pandemitë e ardhshme të ngjashme me Coronavirus.