Edhe nata që kaluam nuk ka qenë e qetë në Paris. Vrasja e 17-vjeçarit nga ana e policisë franceze nuk po i qetëson qytetarët të cilët protestuan në mënyrë të dhunshme në qytet duke djegur automjete dhe duke plasur fishekzjarrë.
Sipas mediave vendase deri më tani policia ka arrestuar 150 persona të cilët kanë qëlluar me fishekzjarrë në drejtim të policisë dhe shkaktuan dëme të mëdha në qytet.
Ministri i Brendshëm francez i cilësoi trazirat si dhunë ndaj simboleve të republikës. Ndërkaq presidenti francez Emmanuel Macron e quajti më herët vrasjen e Nahelit “të pafalshme”. Macron ka thirrur në takim disa nga ministrat e tij pas trazirave.
Pavarësisht ndihmës së stafit mjekësor, adoleshenti ndërroi jetë si pasojë e plagëve të marra. Efektivi i policisë ndodhet në paraburgim dhe mbi të rëndon akuza e vrasjes.