Qeveria e Sirisë ka rënë dakord të hapë dy kalime të tjera kufitare për të lejuar që të vijnë ndihma në zonat veri-perëndimore të mbajtura nga opozita, por që janë shkatërruar nga tërmetet. Sipas OKB ky është një lajm shumë i mirë.
“Kjo do të bëjë një ndryshim të madh. Ne po përdorim tani vetëm një kalim,” i tha BBC një zëdhënës i OKB.
Tërmetet kanë vrarë pothuajse 40,000 vetë në të dy vendet. Shumë sirianë janë zemëruar për mungesën e ndihmës për kombin e tyre të shkatërruar më herët edhe nga lufta.
Qeveria e Presidentit Bashar al-Asad ka fajësuar vështirësitë në përpjekjet e shpëtimit mbi ndikimin e sanksioneve perëndimore të vendosura ndaj vendit. Mirëpo, grupet ndërkombëtare të ndihmës thonë se pengesat kryesore janë keqadministrimi i qeverisë së Asadit dhe refuzimi për t’u angazhuar me të gjitha fushat e vendit.
Një marrëveshje e Këshillit të Sigurimit të OKB-së autorizon vetëm përdorimin e kalimit kufitar Bab al-Hawa për furnizimet me ndihma të OKB-së nga Turqia në veri-perëndim të mbajtur nga opozita. Të gjitha furnizimet e tjera kanë për qëllim të shkojnë nëpërmjet Damaskut, ndonëse në të kaluarën qeveria ka lehtësuar vetëm një sasi të vogël të ndihmës “ndërkufitare”.
Më shumë se 5,700 vetë dihet se janë vrarë në Siri nga tërmetet e 6 shkurtit. Në Turqi, numri i të vdekurve ka kapërcyer tashmë 31,000.
Më shumë se një milion njerëz kanë mbetur të pastrehë në Turqi dhe në Siri, por ky numër mund të jetë shumë më i lartë, paralajmërojnë organizatat e ndihmës.
Ekipet e shpëtimit në të dy vendet po përfundojnë operacionet e shpëtimit në zonën e gjerë, pasi shanset për të gjetur të mbijetuar të tjerë po veniten me kalimin e orëve.
