Një tjetër rekord është shënuar për 2022. Oqeanet kanë qenë më të ngrohta duke pësuar rritje të temperaturës nga viti në vit. Kjo është një shenjë shqetësuese e krizës klimatike të shkaktuar nga njerëzit që pompojnë gazrat që bllokojnë nxehtësinë në atmosferë.
Një studim nga një ekip ndërkombëtar shkencëtarësh nga 16 institute në mbarë botën zbuloi se pesë vitet më të nxehta për oqeanet kanë qenë në gjashtë vitet e fundit dhe se shpejtësia me të cilën po ngrohen po bëhet gjithnjë e më e shpejtë.
Studimi shqyrtoi temperaturat nga sipërfaqja e oqeanit deri në 2,000 metra thellësi, duke i krahasuar me të dhënat që nga vitet 1950.
Rezultatet janë shqetësuese.
“Gjendja e oqeaneve tona mund të masë shëndetin e botës dhe duke gjykuar nga vëzhgimet e përditësuara të oqeanit … ne kemi nevojë për një mjek,” tha ekipi i autorëve në një deklaratë për shtyp shoqëruese.
Për sa i përket energjisë, sasia e nxehtësisë e shtuar në oqeane në vitin 2022 është e barabartë me 100 herë më shumë se gjenerimi total global i energjisë elektrike vitin e kaluar.
Pse ngrohja e oqeanit ka rëndësi
Oqeanet shërbejnë si një tregues i mirë i ndikimit real të ndryshimeve klimatike, sepse krahasuar me temperaturat e ajrit, ato ndikohen më pak nga ndryshimet sezonale dhe ciklet e motit të përditshëm. Duke mbuluar pothuajse tre të katërtat e sipërfaqes së Tokës, oqeanet thithin shumicën dërrmuese të nxehtësisë së botës.
Që nga viti 1970, më shumë se 90% e nxehtësisë së tepërt të planetit shkoi në oqeane. Ngrohja e oqeaneve ka një ndikim të madh në jetën e miliona njerëzve. Ata ndikojnë për të krijuar stuhi, uragane dhe reshje intensive më të fuqishme dhe e bëjnë më të lehtë për stuhitë që të intensifikohen me shpejtësi, siç ndodhi me uraganin Ian, i cili goditi Karaibe dhe Florida në fund të shtatorit.
Ngrohja është gjithashtu një shtytës kryesor i rritjes së nivelit të detit, sepse nxehtësia shtesë shkakton zgjerimin e oqeaneve. Kur uji bëhet më i ngrohtë, molekulat e tij lëvizin më shpejt dhe përhapen më shumë, gjë që rrit vëllimin e tij. Kjo çon në më shumë erozion dhe stuhi bregdetare, si për shembull kur Uragani Nicole goditi zonën e Daytona Beach të Floridës në nëntor.
Rritja e temperaturave do të thotë gjithashtu se ujërat e oqeanit kanë më pak oksigjen, gjë që ndikon në jetën detare, duke dëmtuar komunitetet e peshkimit dhe ekonomitë e tyre.
Nuk janë vetëm oqeanet që po ngrohen me shpejtësi. Një analizë nga Shërbimi i Ndryshimeve Klimatike të Bashkimit Evropian, Copernicus, i publikuar të martën, tregoi se tetë vitet e fundit kanë qenë tetë vitet më të ngrohta të regjistruara, pasi përqendrimi në rritje i gazeve që bllokojnë nxehtësinë në atmosferë i shtyn temperaturat globale drejt një pike kthese të rrezikshme.
