Mali i Zi do të mbajë 3 ditë zie në lidhje me masakrën që ndodhi në qytetin Cetinjë. Një 34-vjeçar, pas një sherri në familje ka qëlluar me armë zjarri duke vrarë 11 persona, ndërsa ka lënë të plagosur 6 të tjerë. Duke cituar burimet policore, televizioni publik malazez bëri të ditur se të shtënat ndodhën pas një mosmarrëveshjeje brenda një familjeje, ndërsa mes 11 personave të vrarë kishte edhe fëmijë.
Ngjarja e rëndë ndodhi dje pak pas orës 16:00 me orën lokale në Cetinjë, një qytet me rreth 18.000 banorë në jugperëndim të Malit të Zi. Autori i ngjarjes, i cili fillimisht u llogarit si një prej viktimave, u identifikua me inicialet V.B. i moshës 34 vjeç. Dy persona kanë marrë trajtim në një spital në Cetinjë. Disa të tjerë u sollën në një spital në Podgoricë, sipas raportimeve të lajmeve.
Kryeministri Dritan Abazoviç tha se kjo ngjarje ishte më e rënda në kujtesën kolektive të malazezëve dhe bëri të ditur se qeveria e Malit të Zi do të shpallë tri ditë zie lidhur me ngjarjen e rëndë.
“U bëj thirrje të gjithë qytetarëve të Malit të Zi që të qëndrojnë pranë me familjet e viktimave të pafajshme, të afërmit e tyre, miqtë dhe të gjithë qytetarët e kryeqytetit të Cetinjës”, tha Abazoviç në Telegram.
