Qeveria e SH.B.A., edhe pse nuk ka prova se Kina “ka marrë një vendim” për të furnizuar Rusia me armë për t’u përdorur në luftë në Ukrainë, e konsideron se kjo mundësi “mbetet në tryezë”.
“Ne besojmë se ky vendim nuk do të ishte në interesin e Kinës” dhe do të njolloste “reputacionin e saj ndërkombëtar,” të cilit i jep rëndësi të madhe, tha John Kirby, zëdhënës i Këshillit të Sigurisë Kombëtare të presidencës amerikane mbi çështjet strategjike, gjatë një informimi për gazetarët në Shtëpinë e Bardhë.
“Ne i kemi shprehur shqetësimin tonë Kinës,” kujtoi ai.
SHBA është angazhuar në një ofensivë diplomatike në shkallë të gjerë, duke paralajmëruar Kinën kundër dhënies së ndonjë ndihme ushtarake vdekjeprurëse për Rusinë, një zhvillim që ekspertët theksojnë se do të ndikonte në kthesën e zhvillimeve në këtë konflikt të armatosur, i cili ka hyrë në vitin e dytë dhe aktualisht nuk ka asnjë shenjë se po i vjen fundi.
Pekini ka mohuar me forcë akuzat e SHBA- së, të bëra në veçanti nga shefi i CIA-s, William Burns.
Nga ana tjetër, kancelari gjerman Olaf Scholz, i cili do të takohet sot më vonë me presidentin amerikan Joe Biden në Shtëpinë e Bardhë, dje kërkoi që Pekini të përmbahet nga furnizimi me armë për Rusinë, të cilën ai e quajti një palë “agresore” në luftën në Ukrainë. Edhe Franca gjithashtu i bëri thirrje Pekinit të tregojë “maturi”.