Administrata Tatimore ka bërë te ditur se individë të caktuar po mashtrojnë bizneset duke u prezantuar si punonjës të këtij institucioni, edhe pse nuk figurojnë të punësuar aty.
Nisur nga denoncimet e fundit nga bizneset, Administrata Tatimore i bën thirrje të gjithë tatimpaguesve të bëjnë kujdes nëse përballen me persona të dyshimtë, që nuk i kanë elementet identifikues, të mos lejojnë futjen e tyre në ambientet e biznesit. Ata kanë publikuar edhe si të dallojnë një punonjës të administratës nga një mashtrues.
“Administrata Tatimore ka identifikuar individë të caktuar, që mashtrojnë bizneset duke u prezantuar si punonjës tatimorë, megjithëse nuk janë të punësuar në strukturat e Administratës Tatimore.
Sqarojmë tatimpaguesit dhe opinionin publik se punonjësit e Administratës Tatimore ushtrojnë detyrat e tyre funksionale, në zbatim të legjislacionit tatimor në fuqi, duke u identifikuar në subjekte me elementet si më poshtë:
– Badge identifikues (Emer/Mbiemër/Foto/Pozicioni i punës/Emërtimi i Drejtorisë)
– Urdhri i punës i firmosur nga drejtuesi i Drejtorisë përkatëse
– Uniformat dalluese me mbishkrimin: Administrata Tatimore”, thuhet në njoftim.
Për këtë qëllim tatimet kanë vënë në dispozicion numrin e gjelbër për të kontaktuar Qendrën e Thirrjeve.
“Administrata Tatimore i bën thirrje të gjithë tatimpaguesve të bëjnë kujdes nëse përballen me persona të dyshimtë, që nuk i kanë elementet si më sipër, të mos lejojnë futjen e tyre në ambjentet e biznesit si edhe të denoncojnë menjëherë në kanalet e komunikimit të Administratës Tatimore:
– [email protected]
– [email protected]
[email protected]
si edhe të kontaktojnë Qendrën e Thirrjeve, numrin e gjelbër: 08000002”, përfundon njoftimi.
