Ylli amerikan Clooney – i cili do të përshtatë serialin ikonik televiziv francez Le Bureau des Legends për audiencën anglishtfolëse – thuhet se ka financuar një fermë komunale që do të ndërtohet në departamentin jugor francez të Var.
E vendosur në Brignoles, në veri të Toulon, ferma do të ofrojë perime dhe fruta të prodhuara në vend për fëmijët e shkollave në qytet, sipas Le Parisien.
Clooney dhe gruaja e tij, Amal, zotërojnë prona në Canadel – të vendosura gjithashtu përgjatë Mesdheut në departamentin Var.
Sipas kryetarit të bashkisë së qytetit, Didier Bremond, familja Clooney janë të përfshirë në mënyrë aktive në qytet, edhe pse ata nuk jetojnë atje gjatë gjithë vitit.
Çifti i propozoi kryetarit të bashkisë që të mund të ndihmonin për të financuar një ngastër toke për të kultivuar fruta dhe perime të freskëta për qytetin.
Plani është që i gjithë ushqimi i prodhuar në fermën komunale të shkojë në mensat e shkollave të qytetit, për të ndihmuar në ruajtjen e angazhimit të tyre për t’u ofruar nxënësve ushqim organik.
Le Parisien foli me anëtarët e qytetit të Brignoles, të cilët kanë filluar ta quajnë Clooney “George l’écolo” (Xhorxh ambientalisti).
Një shitës, Michel, i tha të përditshmes franceze se si aktori kishte dhënë ndihmë financiare për viktimat e përmbytjeve në qytet vetëm dy vjet më parë.
“Këtë herë ai është përkushtuar ndaj fëmijëve të qytetit. Mendoj se është shumë mirë”, tha shitësi për Le Parisien.
Ferma pritet të funksionojë brenda javëve në vijim.
