Finalja e Kupës së Italisë 2023 është Inter-Fiorentina! Përballja do të luhet më 24 maj në Stadio Olimpico të Romës. “Vjollcët” siguruan kualifikimin duke mundur Kremonezen me rezultatin e përgjithshëm 2-0.
Takimi i kthimit në stadiumin “Franki” përfundoi pa gola me Fiorentinën që rikthehet në finalen e këtij kompeticioni pas 9 vitesh, ndërsa për herë të fundit këtë trofe e ka fituar 22 vite më parë. Ndeshja e kthimit dhuroi pak emocione me ekipin e Italianos që tregoi kujdes në prapavijë, duke mos u lënë kundërshtarëve hapësira.
Cremonese u përpoq të befasonte vendasit, por nuk e kishte magjinë si në takimet kundër Napolit dhe Romës. Pas Interit, edhe “vjollcët” kanë siguruar një vend në finalet e Superkupës së Italisë. Dy ekipet e tjera do të dalin nga renditja përfundimtare e vendit të parë dhe të dytë në Serie A.