Lulja e jaseminit njihet në mbarë botën, jo vetëm për bukurinë dhe aromën, por ajo është pjesë e pandarë e vlerave të bimëve mjekësore. Kjo lule prej shekujsh zbukuron oborret dhe rrugicat edhe në Shqipëri. Tani është periudha e lulëzimit madhështor të kësaj peme. Emri jasemin vjen nga persishtja dhe do të thotë “Dhurata e Perëndisë”, falë vetive të përkryera që ajo sjell në të mirë të njerëzimit. Çaji i jaseminit përftohet nga ekstrakti i luleve me aromë e shije të jashtëzakonshme, si edhe nga gjethet.
Çaji i jaseminit është i pasur me antioksidantë siç janë katekina dhe epikatekina që kanë shumë vlera për të gjithë organizmin. Këto antioksidantë ndihmojnë në uljen e rrahjeve të shpeshta të zemrës, luftojnë sëmundjet e zemrës dhe ulin kolesterolin e dëmshëm.
Vlerat shëndetësore të çajit të jaseminit
Plot antioksidantë
Çaji i jaseminit është i pasur me antioksidantë që ndihmojnë në eliminimin e radikaleve të lira të cilat shkaktojnë një sërë sëmundjesh. Ky çaj, përmirëson sistemin imunitar dhe parandalon shfaqjen e sëmundjeve kronike.
Mbron shëndetin e zemrës
Katekina që gjendet në çajin e jaseminit ndihmon në uljen e kolesterolit të keq që është shumë i dëmshëm për arteriet. Ky antioksidant ul edhe tensionin e gjakut, duke parandaluar kështu sëmundjet e zemrës, goditjet në tru dhe stresin oksidues.
Ngadalëson plakjen e organizmit
Antioksidantët tek çaji i jaseminit ndihmojnë në ngadalësimin e procesit të plakjes. Sipas burimeve ato eliminojnë radikalet e lira që shkaktojnë plakje të parakohshme.
Parandalon zhvillimin e qelizave të dëmshme
Disa studime të kryera në Japoni, tregojnë se polifenolët që luftojnë radikalet e lira, kanë aftësinë të zvogëlojnë shanset e shfaqjes së tumoreve të mushkërive dhe atij të gjirit. Për më tepër, këto polifenolë ulin gjasat e rishfaqjes së qelizave malinje tek gratë që i janë nënshtruar ndërhyrjeve kirurgjikale kundër masave të dëmshme të gjirit.
Rregullon qarkullimin e gjakut
Mbron nga diabeti
Çaji i jaseminit mbron organizmin prej dëmeve të shkaktuara nga diabeti. Ky çaj përmbajnë substance që ndihmojnë në parandalimin e shfaqjes së kësaj sëmundjeje.
Largon stresin
Çaji i jaseminit largon stresin dhe ofron qetësim. Aroma e jaseminës ndihmon organizmin të çlirojë substanca që shkaktojnë një qetësim të menjëhershëm dhe ulin rrahjet e zemrës.
Kundër çrregullimeve të tretjes
Çaji i jaseminit e mban stomakun të shëndetshëm dhe e mbron atë nga radikalet e lira. Antioksidantët që gjenden te ky çaj përmirësojnë edhe lëvizjen dhe funksionet e zorrëve.
Lehtëson dhimbjet e kyçeve
Çaji i jaseminit këshillohet kundër artritit falë aftësive për të luftuar inflamacionin dhe parandalimin e oksigjenimit të panevojshëm të qelizave.
Si të përgatisni çajin e jaseminit
Përbërësit
1 lugë gjelle me lule dhe gjethe jasemini të thara
300 ml ujë
Sheqer, mjaltë ose ëmbëlsues të tjerë
Përgatitja
Zieni ujin në çajnik për 2 minuta. Shtoni lulet dhe gjethet e lules së jaseminit dhe lërini të ziejnë së bashku për 2 deri në 3 minuta të tjera. Hiqeni çajnikun nga zjarri dhe lëreni të ftohet për një minutë. Kullojeni çajin dhe hidheni në filxhan. Hidhni pak nga ëmbëlsuesi i preferuar dhe pini.
Kujdesi ndaj çajit të jaseminit
Femrat shtatzënë nuk duhet të pinë çaj jasemine sepse mund të shkaktojë kontraktime të parakohshme. Çaji i jaseminit ka përmbajtje të fortë, ndaj nuk duhet pirë me stomakun bosh sepse mund t’ju japë dhimbje.
