Udhëheqësit e Bashkimit Evropian kërkojnë të bindin kryeministrin hungarez Viktor Orban që t’i bashkohet një plani për të ofruar financim të qëndrueshëm për Ukrainën. Ata janë të gatshëm t’i japin paratë Kievit pa Hungarinë nëse argumentet e tyre dështojnë.
Plani është të ndihmojë në mbulimin e nevojave të Ukrainës 2024-2027 me 33 miliardë euro (36 miliardë dollarë) kredi dhe 17 miliardë euro grante. Paratë do të vijnë nga buxheti i BE-së për t’i dhënë Kievit fonde më të parashikueshme ndërsa lufton pushtimin rus.
BE-ja e ka ndihmuar Ukrainën që nga pushtimi i Moskës në vitin 2022, por deri më tani ka qenë përmes marrëveshjeve ndërqeveritare që kërkojnë miratime kombëtare çdo vit dhe janë më të kushtueshme dhe komplekse sesa financimi përmes buxhetit të BE-së.
Stabiliteti i financimit katërvjeçar që do të siguronte buxheti i BE-së është edhe më i rëndësishëm në një kohë kur ndihma financiare nga Shtetet e Bashkuara, një tjetër ofrues i madh ndihme për Ukrainën, është i pasigurt për shkak të grindjeve të brendshme në Kongresin e SHBA.
Për të përdorur buxhetin e BE-së, të 27 vendet anëtare duhet të bien dakord dhe Hungaria, e cila ka lidhje të ngushta me Moskën, dëshiron të jetë në gjendje të vërë veton ndaj disbursimeve çdo vit. 26 vendet e tjera të BE-së e kanë refuzuar kërkesën e Hungarisë çka ka sjellë përplasje që nga dhjetori.