Miratimi i fletës së votimit për zgjedhjet vendore të 14 majit është shtyrë për një moment të dytë. Kjo sepse 3 kandidatë janë në proces hetimi, pas akuzohen se kanë shkelur ligjin e dekriminalizimit. Lajmi është bërë i ditur nga kreu i Komisionit Qendror të Zgjedhjeve, Ilirjan Celibashi. Celibashi tha se do të presin një vendim nga Komisioni i Ankimeve dhe Sanksioneve dhe më pas nëse do të ketë apelim do pritet edhe Kolegji Zgjedhor.
“Në seancën e sotme kemi zhvillimin e procedurave për hedhjen e shortit për renditjen e disa kandidatëve për kryetarë bashkie në disa bashki, por do ta shtyjmë sepse kemi marrë një kërkesë nga një subjekt zgjedhor, i cili kërkon që të bëhet hedhja e shortit, paraprakisht, për subjektet zgjedhore dhe pastaj për kandidatët për kryetarë bashkie. Edhe për këta të fundit, të bëhet për të gjithë në të njëjtën kohë. Meqenëse për 3 kandidatë jemi akoma në procedurë shqyrtimi të ankimeve, do duhet të presim përfundimin ne shqyrtimit të ankimeve në KAS dhe në Kolegjin Zgjedhor”, theksoi ai.
Megjithatë, Celibashi nuk dha emra se për cilët kandidatë bëhet fjalë.
“Teorikisht janë vetëm tre kandidatë deri në momentin që flasim, do shohim në momentin që do bëhet publike lista e të gjithë kandidatëve, jo vetëm për kryetarë, për edhe anëtarë, janë rreth 28 mijë e 800 kandidatë që mund ti nënshtrohen procesit të verifikimit të thelluar nëse ka indice”, shtoi Celibashi.
Bëhet fjalë për Kryebashkiakun aktual socialist i Kuçovës Kreshnik Hajdari. Opozita pretendon se Hajdari është dënuar në Greqi, fakt që nuk e ka deklaruar në Formularin e Dekriminalizimit e për këtë arsye kërkojnë t’i ndalohet kandidimi. Një tjetër kryebashkiak socialist është ai i Bashkisë së Mallakastrës, Qerim Ismailaj. Dënimi me 40 ditë orë punë publike, pasi nuk kishte deklaruar një dënim në Greqi për rrahje, për Partinë Demokratike duhej të ndalonte rikandidimin e tij. Kandidati tjetër është ai i koalicionit “Bashkë Fitojmë” për Shijakun Rezeart Tushe. Partia Socialiste kërkon ta lërë jashtë kandidimit sepse PS pretendon se dëbimi i tij nga Zvirca lidhet me një dënim për posedim të lëndëve narkotike.