21 palestinezë janë vrarë dhe disa të tjerë janë plagosur pas bombardimit nga avionët luftarakë izraelitë. Situata humanitare për palestinezët mbetet dramatike. Franca dhe Jordania kanë dorëzuar 7.7 ton ndihma mjekësore
“Rripi i Gazës është i pabanueshëm”, thotë koordinatori i OKB-së për çështjet humanitare.
Teksa kërcënime të reja për Izraelin dhe Shtetet e Bashkuara vijnë nga Irani dhe Hezbollahu, Sekretari amerikan i Shtetit, Blinken ka nisur misionin e tij në Lindjen e Mesme duke filluar me vizitën e tij në Turqi.
Frika mbi zgjerimin e konfliktit Izrael-Hamas në një luftë rajonale është rritur pas vrasjes së zëvendës shefit të Hamasit, Saleh al-Arouri në Liban. Izraeli as nuk ka pranuar dhe as nuk ka mohuar të jetë pas këtij sulmi që ndodhi ditën e martë të 2 janarit 2024.