Drejtori i Zyrës për Kosovën në Qeverinë e Serbisë, Petar Petkoviç, deklaroi se qeveria serbe do të lejojë lëvizjen e të gjitha automjeteve nga Kosova në territorin e Serbisë.
“Lejimi i të gjitha automjeteve të regjistruara nga Institucionet e Përkohshme të Vetëqeverisjes në Prishtinë për të marrë pjesë në komunikacion në rrugë bëhet ekskluzivisht për arsye praktike, me qëllim që të lehtësohet pozita e individëve dhe të mundësohet liria e tyre e lëvizjes”, tha Petkoviç.
Vendimi i Serbisë do të hyjë në fuqi më 1 Janar 2024, por nuk tha konkretisht nëse targat e automjeteve do të mbuloheshin ose jo me letra ngjitëse kur të kalojnë kufirin.
Para vendosjes së letrave ngjitëse, mjetet me targa RKS merrnin targa provuese për të kaluar kufirin me Serbinë, çka nxiti pakënaqësi dhe reagime nga serbët e Kosovës. Ata bllokuan pikat kufitare të Jarinjës dhe Bërnjakut.
Me ndërmjetësimin e Bashkimit Evropian, më 30 shtator 2021, u arrit marrëveshja e përkohshme për targat, me qëllim zbutjen e tensioneve mes dy vendeve.