Ministri i Punëve të Brendshme të Serbisë, Bratisllav Gashiç, paralajmëroi se do të hapet një shtab policor në Preshevë, në jug të Serbisë. Sipas tij, shtabi do të shërbejë për të intensifikuar veprimet në zonën kufitare me Maqedoninë e Veriut dhe Bullgarinë.
“Policia po bën gjithçka për të frenuar migrimin e parregullt dhe për të dekurajuar dhe arrestuar të gjithë trafikuesit e njerëzve”, njoftoi Ministria e Brendshme serbe më 30 nëntor. “Anëtarët e MPB-së do të marrin të gjitha masat për të parandaluar kalimin e parregullt të emigrantëve në vendin tonë. Ne do të qëndrojmë në këtë zonë, por edhe në veri të vendit, derisa ta zgjidhim plotësisht këtë problem”, tha Gashiç në qendrën rajonale të policisë kufitare në drejtim të Bullgarisë.
Presheva është komunë e banuar me shumicë shqiptare dhe së bashku me Bujanocin dhe Medvegjën, ku jetojnë po ashtu shqiptarë, njihen si Lugina e Preshevës.