Lirimi i pengjeve sipas marrëveshjes për një armëpushim të përkohshëm, midis Izraelit dhe militantëve palestinezë të Hamasit nuk do të ndodhë përpara të premtes. Këtë e njoftuan këshilltarët e sigurisë kombëtare të Izraelit dhe SHBA, duke shuar shpresat e të afërmve se disa do të lirohen sot.
Izraeli dhe Hamasi ranë dakord dje, për një armëpushim në Gaza për të paktën katër ditë, për të lejuar ndihma humanitare dhe për të liruar të paktën 50 pengje të mbajtura nga militantët, në këmbim të të paktën 150 palestinezëve të burgosur në Izrael.
Edhe pse u tha fillimisht se ky armëpushim do të niste sot në orën 10, kjo nuk pritet të ndodhë, sipas informacioneve të fundit të dhëna nga mediat ndërkombëtare. Ndërkaq sipas këshilltarit të sigurisë negociatat për lirimin e pengjeve po avancojnë.
Sot herët në mëngjes nuk pati asnjë ndalim të luftimeve. Mediat palestineze thanë se avionët dhe artileria izraelite goditën qytetin jugor të Gazës, Khan Younis (Khan Junis) në të paktën dy valë dhe 15 njerëz u vranë. Sulme u raportuan gjithashtu në disa pjesë të tjera të Gazës.