Izraeli dhe Hamasi kanë rënë dakord për një marrëveshje të përkohshme armëpushimi katër ditore që do të mundësojë lirimin e rreth 50 personave që janë mbajtur robër në Gaza që kur grupi i armatosur i Hamasit sulmoi Izraelin jugor më 7 tetor, në këmbim të palestinezëve të mbajtur në burgjet izraelite.
Kabineti izraelit e mbështeti marrëveshjen pas bisedimeve mbi një marrëveshje të ndërmjetësuar nga Katari që vazhduan deri në orët e para të mëngjesit të ditës së sotme. Mediat izraelite raportuan për debate të ashpra midis ministrave të qeverisë së kryeministrit Benjamin Netanyahu.
Zyra e kryeministrit tha se sipas marrëveshjes Hamasi do të lirojë të paktën 50 gra dhe fëmijë dhe për çdo 10 pengje të liruar shtesë, pauza do të zgjatej me një ditë. Ndërsa Izraeli do të lirojë 150 të burgosur palestinezë në këmbim.
Po ashtu do të lejohet kalimi i kamionëve të ndihmave humanitare, mjekësore dhe karburantit në të gjithë zonën e rrethuar. Ende nuk është e qartë se kur do të fillojë ky armëpushim, por Katari thotë se kjo do të njoftohet në 24 orët e ardhshme