Shtetet e Bashkuara vendosën të enjten sanksione ndaj katër rusë që i akuzuan se ishin të përfshirë në helmimin e liderit të opozitës ruse të burgosur, Alexei Navalny. Departamenti i Thesarit të SHBA-së në një deklaratë tha se katër të sanksionuarit janë të lidhur me Shërbimin Federal të Sigurisë së Rusisë (FSB).
“Sot i kujtojmë Vladimir Putinit dhe regjimit të tij se ka pasoja jo vetëm për zhvillimin e një lufte brutale dhe të paprovokuar kundër Ukrainës, por edhe për shkeljen e të drejtave të njeriut të popullit rus”, tha nënsekretari i Thesarit për Terrorizmin dhe Inteligjencën Financiare, Brian Nelson. “Përpjekja për vrasje kundër Aleksey Navalny në vitin 2020 përfaqëson përbuzjen e Kremlinit për të drejtat e njeriut dhe ne do të vazhdojmë të përdorim autoritetet në dispozicionin tonë për të kërkuar llogari xhelatët e mundshëm të Kremlinit”, shtoi ai.
Sanksionet e së enjtes u vendosën sipas një akti të vitit 2012, i cili autorizon qeverinë amerikane të sanksionojë ata që lidhen me shkeljet e rënda të të drejtave të njeriut në Rusi, duke ngrirë asetet e tyre dhe duke i ndaluar hyrjen në Shtetet e Bashkuara.