Fjala “joga” rrjedh nga sanskritishtja dhe do të thotë bashkim mes trupit dhe ndërgjegjes. Rrënjët e saj datojnë që nga lashtësia, në Indi, ndërsa sot praktikohet në forma të ndryshme në mbarë botën dhe vazhdon të rritet në popullaritet.
Më 11 dhjetor 2014, OKB-ja e shpalli 21 qershorin si Ditën Ndërkombëtare të Jogës me rezolutën 69/131. Dita Ndërkombëtare e Jogës synon të rrisë ndërgjegjësimin në mbarë botën për përfitimet e shumta të praktikimit të jogës.
Projektrezoluta që përcakton Ditën Ndërkombëtare të Jogës u propozua nga India dhe u miratua nga 175 shtete anëtare.
Propozimi u prezantua për herë të parë nga kryeministri Narendra Modi në edicionin e 69-të të Asamblesë së Përgjithshme, në të cilën ai tha se joga është një dhuratë e paçmuar nga tradita e lashtë. Joga mishëron unitetin e mendjes dhe trupit, mendimin dhe veprimin … një qasje gjithëpërfshirëse që është e vlefshme për shëndetin dhe mirëqenien tonë.
Joga nuk ka të bëjë vetëm me stërvitjen, ajo është një mënyrë për të zbuluar ndjenjën e të qenit një me veten, botën dhe natyrën.
Rezoluta thekson rëndësinë e individëve dhe popullatave që bëjnë zgjedhje më të shëndetshme dhe ndjekin modele të jetesës që nxisin shëndetin e mirë.
Në këtë drejtim, Organizata Botërore e Shëndetësisë u ka kërkuar shteteve të saj anëtare të ndihmojnë qytetarët e tyre të reduktojnë pasivitetin fizik, i cili është ndër dhjetë shkaqet kryesore të vdekjeve në mbarë botën, dhe një faktor kryesor rreziku për sëmundjet jo të transmetueshme, si sëmundjet kardiovaskulare, kanceri dhe diabeti.
