Los Angeles Lakers eliminoi kampionët në fuqi të NBA, Golden State Warriors, në raundin e dytë të play-off-it të këtij viti.
Në ndeshjen e gjashtë, Lakers mposhtën në fushën e tyre Warriors 122:101, duke kaluar kështu në finalen e Konferencës Perëndimore me fitoren 4-2.
Lakers arritën fitoren e katërt vendimtare në mënyrë dominuese, kaluan në epërsi 27:10 në fillim të ndeshjes dhe në asnjë moment nuk lejuan mysafirët të kalojnë në avantazh.
Madje, në mesin e pjesës së katërt maksimumi i diferencës shkoi në 24 pikë (106:82) dhe pjesa tjetër e duelit ishte vetëm një formalitet, transmeton Hina.
38-vjeçari fenomenal LeBron James udhëhoqi sërish Lakers drejt fitores me 30 pikë, nëntë kërcime dhe asistime.
James pati një ndihmës të madh te Austin Reaves, i cili përveç 23 pikëve grumbulloi edhe gjashtë kërcime dhe pesë asistime, kurse Anthony Davis ishte gjithashtu i shkëlqyer poshtë tabelës me 17 pikë dhe madje 20 kërcime.
Vetëm Stephen Curry, i cili u ndal në 32 pikë, u përpoq të mbante Warriors në lojë.
Edhe pse të dyja skuadrat goditën nga 13 tre pikë secila, Lakers përdorën gjuajtjen nga distanca shumë më efikase, sepse arritën në ato 13 trepikësha nga 26 përpjekje, ndërsa Warriors përdorën 48 përpjekje për të njëjtin numër goditjesh.
Lakers, të cilët ishin në fund të perëndimit për pjesën më të madhe të sezonit të ligës dhe hynë në turneun “play in” vetëm në finale, luajtën basketbollin më të mirë të sezonit në play-off dhe kundërshtarët e tyre të ardhshëm do të jenë Denver Nuggets, të cilët mposhtën Phoenix Suns 4:2.
Për Warriors, kampionë në 2015, 2017, 2018 dhe 2022 dhe finalistë në 2016 dhe 2019, kjo është humbja e parë ndaj një ekipi perëndimor që kur Steve Kerr mori drejtimin.
Për shkak të problemeve të mëdha të lëndimeve, Warriors nuk u kualifikuan as në play-off në 2020 dhe 2021.
