Qytetarët e Elbasanit, Vorës e Kamzës nga sot mund ta testojnë votimin elektronik në qytetet e tyre, në pritje të garës elektorale të 14 majit. Kryekomisioneri Ilirjan Celibashi nga Elbasani tha se sistemi është i sigurt dhe nuk mund hackerohet.
“Nga pikëpamja e sigurisë dhe fshehtësisë së votës, pajisja ka siguri 100%. Nuk ka asnjë lloj mënyre për të identifikuar votën e votuesve. Garantohet fshehtësia ndaj do t’i ftoja votuesit e këtyre 3 bashkive që pa hezitim të votojnë për kandidatët, pa qenë në dyshim që vota e tyre do të jetë publike. Pajisja dhe sistemi i ofron të gjitha, as sistemi i zgjedhjeve, as kompania s’ka mundësi për të verifikuar mbi votën e qytetarëve”, tha Celibashi.
Pajisja është e thjeshtë në votim edhe për moshën e thyer. Sistemi e ndalon dhe votimin familjar. Në Elbasan është vendosur sistemi në tre pika, në bashkinë e Kamzës në 2 ambiente dhe në bashkinë e Vorës 1 ambient.