Lajmet për qarkullimin e disa dronëve mbi Detin e Veriut kanë shkaktuar shqetësime në Norvegji. Sipas asaj që raportojnë zyrtarët norvegjezë, Kremlini po synon që të godasë objektet e gazit në një përpjekje për të frikësuar vendin për shkak edhe të sanksioneve perëndimore.
Ekspertët ushtarakë dyshojnë se dronët janë vepër e Moskës. Ata renditin spiunazhin, sabotimin dhe frikësimin si motive të mundshme. Qeveria norvegjeze ka dërguar anije luftarake, anije të rojës bregdetare dhe avionë luftarakë për të patrulluar objektet në det të hapur. Garda kombëtare e Norvegjisë stacionoi ushtarë rreth rafinerive.
Kryeministri norvegjez Jonas Gahr Store ka ftuar marinat e aleatëve të NATO-s Francës, Gjermanisë dhe Mbretërisë së Bashkuar për të ndihmuar në adresimin e asaj që mund të jetë më shumë se një problem norvegjez. Ai paralajmëroi se Norvegjia do të ndërmarrë veprime kundër agjencive të huaja të inteligjencës . “Nuk është e pranueshme që inteligjenca e huaj të fluturojë me dronë mbi aeroportet norvegjeze,” tha ai.
Mbyllja e aeroporteve dhe evakuimet e një rafinerie nafte dhe një terminali gazi javën e kaluar për shkak të pamjeve të dronëve shkaktuan ndërprerje të mëdha. Por me afrimin e dimrit në Evropë, ekziston shqetësimi se dronët mund të paraqesin një kërcënim më të madh për tubacionet e gazit që kalojnë nga platformat detare të Norvegjisë në terminalet në Mbretërinë e Bashkuar dhe Evropën kontinentale.
Që nga fillimi i luftës në Ukrainë në fund të shkurtit, vendet e Bashkimit Evropian janë përpjekur të zëvendësojnë importet e tyre të gazit rus me dërgesa nga Norvegjia. Policia norvegjeze ka punuar ngushtë me hetuesit ushtarakë që po analizojnë trafikun detar. Disa operatorë platformash kanë raportuar gjithashtu se kanë parë anije kërkimore me flamur rus në afërsi. Shqetësimi i qeverisë norvegjeze është se qarkullimi i dronëve mbi infrastrukturën jetike, mund të shkaktojë sabotim kundër Perëndimit.