Zhduket Ervis Martinaj. Familja e Ervis Martinaj kallëzon në polici humbjen e kontakteve me të shumëkërkuarin e policisë. Kallëzimi është bërë ditën e djeshme nga Faik Martinaj, xhaxhai i 40 vjeçarit.
Sipas ‘News 24’, xhaxhai i Martinaj pretendon se nuk ka asnjë kontakt me nipin e tij, ndonëse Ervis Martinaj është për momentin një prej njerëzve më të kërkuar nga policia shqiptare.
Mbrëmjen e kaluar në Drejtorinë e Policisë së qarkut Lezhë, Faik Martinaj ka depozituar një kallëzim penal ku pretendon se ka humbur kontaktet me nipin e tij. “Ai ndodhet në kërkim ndërkombëtar pas dëshmisë së Nuredin Dumanit se kishte urdhëruar vrasjen e Indrit Dokles. Xhaxhai ka deklaruar se ka pasur kontakte me njerëz të tjerë që komunikonim me nipin. Dy ditë më parë një shok i Ervis Martinaj ka shkuar në shtëpinë e tij dhe i ka thënë se ka humbur kontaktet me të. Familjarët dyshojnë se atij mund t’i ketë ndodhur diçka e keqe, për faktin se ka armiq të shumtë dhe se është në kërkim ndërkombëtar. Informacioni nga policia është i ngurtë dhe nuk përjashtohet dhe mundësia e një inskenimi. Faik Martinaj pretendon se ai vetë dhe familjarët nuk kishin kontakte direkte por nga informacioni që kanë marrë nga miqtë e Ervis Martinaj, kanë mësuar se ai ka humbur çdo kontakt dhe janë të shqetësuar për jetën e tij. Është hera e parë që një person në kërkim ndërkombëtar zhduket dhe për të afërmit dhe policia është në një situatë të vështirë. Është ngritur një grup i posaçëm hetimor. Ka dhe një mesazh që persona që shoqëroheshin me Ervis Martinaj ia kanë treguar të afërmve të tij, ku thotë ‘kini kujdes se do ketë kontrolle’. Jo një komunikim i drejtpërdrejt, por përmes personazhe me të cilët shoqërohej. Babai i Brilant Martinaj, Faik Martinaj e ka bërë kallëzimin. Policia e shtetit është e dyzuar se si do ta referojë këtë ngjarje sepse statusi i Ervis Martinaj është i një personi në kërkim ndërkombëtar. Disa operacione për kapjen e tij kanë dështuar. Ka precedentë ku persona të kërkuar mund të inskenojnë ngjarje të tilla. Fillimisht nga familjarët është dyshuar se mund të ishte larguar në Dubai, por sipas informacioneve nga policia e Shtetit ai ka qenë brenda territorit shqiptar dhe fshihej në zonat e tij të sigurta. madje ka qenë në Shqipëri dhe gjatë masakrës së Fushë-Krujës ku u vra kushëriri i tij Brilant Martinaj dhe miku i tij Dikler Vata. Është një nga ngjarjet më të vështira dhe më komplekse që ka pasur Policia shqiptare”, raporton ‘News 24’.
Martinaj është në kërkim pasi sipas dëshmisë së të penduarit të drejtësisë Nuredin Dumani kishte urdhëruar vrasjen e Endrit Dokles, atentat që nuk u realizua.
Kallëzimi vjen pak kohë pas masakrës së ndodhur te mbikalimi i Fushës Krujës ku u ekzekutua kushëriri i tij Brilant Martinaj, Dikler Vata dhe Besmir Hoxha. Policia ka dështuar në disa aksione për arrestimin e Ervis Martinaj.
Ndërkohë që në lidhje me pretendimin e familjes nuk dihet nëse është një inskenim nga ana e të shumëkërkuarit apo mund të jetë përpara një tjetër ngjarje të rëndë kriminale.
