Pas një agonie disa ditore është shuar në moshën 61-vjeçare bosi mafioz i ‘Cosa Nostra-s’ Matteo Messina Denaro, i arrestuar në janar pas 30 vitesh në arrati. Gjendja e tij u përkeqësua javët e fundit dhe ra në koma të pakthyeshme. Ish-bosi i drogës u diagnostifikua me kancer në zorrën e trashë në vitin 2020.
Në 9 muajt e paraburgimit, bosi i mafies iu nënshtrua dy operacioneve kirurgjikale të lidhura me ndërlikimet e kancerit. Nga gjendja e tij e përkeqësuar mjekët vendosën të mos e kthenin më në burg, por ta trajtonin në një dhomë të sigurisë maksimale në spital.
I quajtur nga shtypi italian si “Kumbari i fundit”, Matteo Messina Denaro është përgjegjës për shumë vrasje mes tyre edhe të prokurorëve Giovanni Falcone dhe Paolo Borsellino në 1992, krime që tronditën Italinë.